საჯარო ლექცია - „თანამედროვე ციფრული ეპოქა და ქართული ენობრივი მემკვიდრეობა“

27 ოქტომბერს თბილისის სასულიერო აკადემიასა და სემინარიაში, ყოველკვირეული საგანმანათლებლო შეხვედრების ფარგლებში, გაიმართა საჯარო ლექცია თემაზე - „თანამედროვე ციფრული ეპოქა და ქართული ენობრივი მემკვიდრეობა“. მომხსენებელი გახლდათ ლია ქაროსანიძე - ფილოლოგიის მეცნიერებათა დოქტორი, თბილისის სახელმწიფო უნივერსიტეტის არნოლდ ჩიქობავას ენათმეცნიერების ინსტიტუტის თარგმნითი ლექსიკონებისა და სამეცნიერო ტერმინოლოგიის განყოფილების გამგე და სამეცნიერო საბჭოს წევრი. ციფრული რესურსის – „ქართული ტერმინთბანკის“ –კონცეფციის ავტორი და რედაქტორი. მისი კვლევის ძირითადი სფეროებია ბიზანტიურ-ქართული ენობრივი ურთიერთობები, ქართული გრამატიკული აზროვნების ისტორია და თანამედროვე ტერმინოლოგიური პოლიტიკა. მას ეკუთვნის ფუნდამენტური მონოგრაფიები და გამოკვლევები ბიზანტიურ-ქართული ლინგვისტური აზროვნებისა და ქართული ტერმინოლოგიის ისტორიის შესახებ. გორისა და ატენის მიტროპოლიტ ანდრიასთან (გვაზავა) და ბიზანტინოლოგ ნელი მახარაძესთან ერთად მუშაობდა ქართულ საეკლესიო ტერმინთა ისტორიის მასალებზე, კვლევის შედეგები გამოქვეყნებულია კრებულში – ”მასალები ქართული საეკლესიო ტერმინთა ისტორიისათვის“.