საერთაშორისო სიმპოზიუმი

 „საღვთისმეტყველო განათლება დღეს – გამოწვევები და შესაძლებლობები“
 
საქართველოსა და მის ფარგლებს გარეთ წელს მასშტაბურად აღინიშნება საქართველოში ქრისტიანობის სახელმწიფო რელიგიად გამოცხადებიდან 1700 წლის იუბილე. ეს მნიშვნელოვანი შესაძლებლობაა, კიდევ ერთხელ წარმოვაჩინოთ როგორც საქართველოს უნიკალური ქრისტიანული კულტურა, ისე საღვთისმეტყველო განათლების განსაკუთრებული როლი ჩვენი ქვეყნის მრავალსაუკუნოვანი ქრისტიანობის ისტორიაში. სწორედ ამ საიუბილეო თარიღს მიეძღვნა საერთაშორისო სიმპოზიუმი „საღვთისმეტყველო განათლება დღეს – გამოწვევები და შესაძლებლობები“, რომელიც 12-13 ნოემბერს გაიმართა გერმანიაში, მაინის ფრანკფურტში, წმინდა გიორგის სახელობის ფილოსოფიურ-საღვთისმეტყველო უმაღლეს სასწავლებელში.
 
სიმპოზიუმის მუშაობაში გერმანიისა და ევროპის სხვადასხვა უმაღლესი სასწავლებლის თვალსაჩინო წარმომადგენლებთან ერთად მონაწილეობას იღებდა თბილისის სასულიერო აკადემია და სემინარია.
 
სიმპოზიუმის ორგანიზება და ჩატარება შესაძლებელი გახდა მაინის ფრანკფურტში საქართველოს გენერალური კონსულის, პროფესორ გიორგი ხუბუას დიდი მხარდაჭერითა და პირადი ძალისხმევით.
 
თსას-ის დელეგაციას ხელმძღვანელობდა რექტორი, თეოლოგიის, ფილოლოგიისა და პოლიტიკის მეცნიერებათა დოქტორი, პროტოპრესვიტერი გიორგი ზვიადაძე, რომელიც სიმპოზიუმის ერთ-ერთი მთავარი მომხსენებელიც იყო.
 
აკადემიის რექტორი დამსწრე საზოგადოებას საქართველოს კათოლიკოს-პატრიარქ შიო მესამისა და საქართველოს ეკლესიის სახელით მიესალმა და დიდი მადლიერება გამოხატა მაინის ფრანკფურტში საქართველოს გენერალური კონსულის, გიორგი ხუბუასა და წმინდა გიორგის სახელობის უნივერსიტეტის ხელმძღვანელობის მიმართ. პროტოპრესვიტერ გიორგი ზვიადაძის მოხსენება ეხებოდა საქართველოში საღვთისმეტყველო განათლების აღორძინებასა და განვითარებას კათოლიკოს-პატრიარქ ილია II-ის მოღვაწეობის პერიოდში.
 
თსას-ის წარმომადგენლებმა, პრორექტორმა, თეოლოგიის დოქტორმა რატი სტურუამ და რექტორის თანაშემწემ, დოქტორმა თამარ სანიკიძემ, თავიანთ მოხსენებებში ვრცლად ისაუბრეს საქართველოში საღვთისმეტყველო განათლების ისტორიული გამოცდილებისა და თანამედროვე მიდგომების შესახებ. ხოლო სასულიერო აკადემიის საზოგადოებასთან ურთიერთობის სამსახურის წარმომადგენლის, ელისაბედ აბულაძის მოხსენება ეხებოდა მასობრივი კომუნიკაციების საშუალებების როლსა და მნიშვნელობას საღვთისმეტყველო განათლებაში.
 
ორდღიანი სიმპოზიუმის ფარგლებში განსაკუთრებული ყურადღება დაეთმო ქრისტიანული ტრადიციის ადგილისა და როლის კვლევას თანამედროვე საზოგადოებაში, აგრეთვე იმ გამოწვევათა ანალიზს, რომელთა წინაშეც დღეს საღვთისმეტყველო განათლება დგას.
 
სიმპოზიუმის დასასრულს, როგორც ორგანიზატორებმა, ისე სიმპოზიუმის მუშაობაში მონაწილე მეცნიერებმა საყურადღებო მოსაზრებები გამოთქვეს სამომავლო საქმიანობისა და თანამშრომლობის მიმართულებით.
14.11.2026
ბეჭდვა